Anshari Dalan

“Ito ang lagi kong pinapaalala sa sarili ko kung bakit ko ipinagpapatuloy ang lahat,” pagbabahagi ni Anshari Kirsten Dalan.

Si Anshari Kirsten Dalan, na nagtapos ng BS Chemical Engineering sa University of the Philippines Diliman, ay naging summa cum laude at valedictorian ng kanilang programa.

Ngunit sa likod ng kanyang tagumpay ay nakatago ang kwento ng matinding pagsisikap, sakripisyo, scholarship, at isang pamilyang buong tahimik na nagsuporta sa kanyang pangarap.

Sa hirap ng buhay lumaki si Dalan. Bata pa lamang siya ay alam na niyang kailangan niyang umasa sa scholarship allowance para maipagpatuloy ang pag-aaral. Kahit libre ang tuition sa kolehiyo, problema pa rin ang pang-araw-araw na gastos, school requirements, at thesis expenses.

Para masuportahan ang sarili, nagtutor siya habang nag-aaral sa UP Diliman. Mula Diliman ay bumibiyahe siya patungong Pasig, at may mga pagkakataong umaabot pa hanggang Antipolo o Taguig upang magturo sa mga high school students.

May mga araw na inaabot siya ng hatinggabi sa trabaho, at kahit may exam kinabukasan ay kinakailangan pa rin niyang magturo.

Ang kanyang pamilya ang naging pangunahing dahilan ng kanyang pagpupursige.

Dating janitor ang kanyang ama bago naging lisensyadong security guard, habang direct seller naman ang kanyang ina. Inamin ni Dalan na noong bata pa siya ay nahihiya siyang ikwento ang trabaho ng kanyang mga magulang.

Ngunit habang siya ay tumatanda, mas lalo niyang pinahalagahan ang kanilang sakripisyo. Ang mga trabahong minsan niyang ikinahiya ang naging inspirasyon niya upang magsumikap nang husto.

Bagama’t hindi nakatapos ng kolehiyo ang kanyang mga magulang, hindi nila nakalimutang hikayatin siya at ang kanyang kapatid na tapusin ang kanilang pag-aaral. Ang kanilang mga sakripisyo at pangaral ang tumulong sa kanya upang malampasan ang pagod at pressure ng buhay-kolehiyo.

Matapos makamit ang isa sa pinakamataas na karangalan sa UP Diliman Chemical Engineering program, naghahanda ngayon si Dalan para sa board exam habang sinusubukan ding makapasok sa master’s program abroad sa ilalim ng Taiwan Exchange Education Program.

Ang kwento ni Anshari ay paalala na sa bawat tagumpay ng isang estudyante ay may mga magulang na tahimik na lumalaban at nagsasakripisyo para sa magandang kinabukasan ng kanilang anak.

Minsan, ang diploma ay hindi lamang bunga ng talino—ito rin ay bunga ng pagmamahal at sakripisyo ng pamilyang hindi sumusuko.